噚日有兩隻零售股一齊急升，一間係賣衫嘅慕詩（130），另一間威高（1173）亦係賣時裝。小初走去問經紀陳兩隻股票上升原因，佢話各有傳聞，慕詩傳配股，而威高就傳有芬佬增持。
慕詩噚日升20%，收1.02元，與52周高位1.25元，仍有一段距離，但成交相當活躍，有成2185萬股，金額2156萬元。
至於威高則升12%，收0.233元，成交股數8780萬股，金額1998萬元。
經紀陳話，近排有證券界人士見過慕詩高層，佢哋話公司舊年雖然受沙士影響，令中期純利降至974萬元，較上年同期大跌38.4%，不過全年表現唔會太差，預計今年則更加靚仔。
此外，家陣市旺，芬佬通街求貨，如果傾啱價錢，唔排除慕詩會進行批股。
至於威高，一早已有芬佬睇起，金手指一直密密收緊威高，情人節前夕已經增持至6%水平。由於金手指向威高投下信心一票，唔排除有其他芬佬跟風，甚至金手指自己亦會繼續增持。
慕容小初