近年炙手可熱嘅新一代寶馬5系，廠方響推出四門房車版後，又會於今屆日內瓦車展會場上，展出全新5系Touring旅行車；新車推出初期將有兩台電油引擎配搭供選擇，當中包括525i型號所採用嘅2.5公升引擎（馬力192匹），同埋545i所配用嘅4.4公升V8偈（馬力333匹），隨後於2005春季又會推出520i及530i型號，以切合不同用家需要。
波箱配搭則會以6前速手波作標準配搭，另最有機會抵港嘅，相信會係配用6前速Steptronic半自動波嘅版本；若想有更佳操控表現，你更可選擇為座駕加裝ActiveSteering等系統，又或者加配AdaptiveHeadlights頭燈組合，去增強晚間行車時嘅安全度。
由於新車尺碼達4480×1850×1490mm，故此車廂空間感會較原有型號來得更好，而將可作60:40式收摺嘅後排座椅收摺起，更能令尾廂容積達至1,650公升，比現有型號增加125公升咁多㗎！備有多套三點式安全帶及安全氣袋為車上乘客帶來保護外，一組尾燈更加入咗BrakeForceDisplay系統，當駕駛者重力踩Brake或ABS系統發揮功效時，車尾煞車燈所亮起嘅範圍會比一般情況來得更大，增加行車安全度。用家亦可選配一套全新Head-upDisplay系統，多項行車資料都會投射於擋風玻璃上，從而令駕駛者可更專心駕駛。