呢排見親小倉優子，佢都係着到好似卡通人物咁為處女細碟宣傳。早幾日我大口羅拉撞見小倉換上成副迷彩軍裝出現，好似去打仗咁款，原來佢係應Xbox邀請嚟露兩手，重同另一位都係叫優子嘅宮村優子一齊喺「機場」上對撼。
小倉優子係近年「妹系」性感女星代表，而宮村優子唔係嚟自水着界，但佢都係大有來頭，佢係日本好出名嘅「聲優」，即係卡通片配音員，佢嘅代表作係聲演《新世紀福音戰士》嘅明日香。兩個優子嗰日為電子遊戲《鐵騎大戰》宣傳，佢哋抽籤要分開兩隊對戰，同場亦有六個幸運機迷獲安排分成兩組落場幫拖。
小倉優子同宮村優子，都要手腳並用咁玩呢個遊戲，真係好似啲機械人卡通入面嘅駕駛員一樣。小倉可能唔係電玩迷，佢反應麻麻，重話好難操作。雖然宮村優子亦話個遊戲好難控制，但佢可能喺卡通片入面見慣世面，所以最後都贏咗小倉。
玩完之後，小倉優子先知道宮村原來係大緊個肚，九月就會做媽咪，佢發現自己竟然輸畀個大肚婆，難怪會覺得好吃驚。