旺角一線街道西洋菜南街，改為行人專用區後，舖位身價不斷飆升，屢創新高，加上市場人士經過一輪衝鋒陷陣，存貨減少，投資者惟有轉向二線街舖。
投資者以二千八百萬，買入西洋菜南街4號A1號舖，實際門面向豉油街，只算二線，每呎十一萬二。
利嘉閣翁鎮滿話，間舖實用面積二百五十呎，交吉，估計出租，每月可以收到十二萬至十三萬，回報可達五厘六。
嗰條街好少放盤，但對面馬路旺角廣場地下，有兩嗰舖放售，六百同六百三十呎，同以二千四百萬求售，每呎三萬八至四萬。
呢間舖成交價同隔一條街嘅星際城市比，重差一大截。早前星際城市商場地下十三B舖，傳出以每呎十八萬易手。上手買入呎價，都要十四萬五。
豪宅市道熱到着火，由一手燒到二手，業主都趁機獲利回吐。
好似跑馬地蔚豪苑A座高層一室，一九九三呎，四房，啱啱易手，業主勁賺逾兩倍，一千一百五十萬。
聽香港置業屠淑明講，單位原業主喺94年用五百五十萬買入，一直收租。最近租客遷出，諗住放售同放租，終於畀個南區客追價，用千七萬買咗，每呎八千五，高市價少少。
屠淑明話，蔚豪苑樓齡得十年，區內算係年輕，而且同區少四房選擇。個客睇完冇耐就扑槌，諗住買嚟自住，改善居住環境。
每季新裝登場，係趕潮流一族好唔得閒嘅日子。
九龍倉銅鑼灣時代廣場、尖沙嘴海港城及鑽石山荷里活廣場，就舉辦「好心換季」活動。只要拎啲舊衣服，去呢幾個商場嘅收集站，就可以換到嗰個商場嘅優惠集一本。喺商場指定商戶買春裝，有折扣。
至於收集到嘅舊衣服，會捐畀救世軍，做慈善用途。
咁喺開心買新衫之餘，又唔使為處置屋企嘅舊衫而煩惱嘞。
當然，商場租戶可以多啲生意。咁都算係一舉兩得。
喺自由行效應，同埋股樓市暢旺推動下，近排食肆人山人海，爆晒棚，要搵位固然困難，搵到都唔好開心住。
蘭西聽友人講，佢晏晝喺中環酒樓食飯，已經再次要睇夥計面色，有時上到枱嘅食物，重貨不對辦，所有經濟好景時候嘅壞態度，全部出番晒嚟。
食肆舊年因為沙士而搞到好慘情，大都要想盡辦法救亡，重點之一，係提高服務水準。但𠵱家情況係點，有眼見，香港人果真善忘。
蘭西
電郵地址：