港股前日挑戰14000不破，理論上都應該整固一下，恒指噚日跌61點，收報13867，成交達201.73億元。淡友力質滙豐（005），以英鎊強勢可能導致盈利被削弱為理由，滙豐最後跌1.1%，收127元。
中國網絡（383）以每股0.30元，配售7.28億股天安中國（028），較周三收市價有10%折讓。噚日天安一開市就跌破配股價，低見0.28元，收報0.29元，跌12%，成交達2.68億元，當中包括配售股份上板。
黑客話，最近公司配股，就算最終跌破配股價，但破底前通常都有人維持秩序，畀承配人有些少走貨獲利空間，但估唔到今次天安批股，連些少水位同沽貨時間都唔畀人，售後服務極差。細問之下，原來今次批股，批到周街都係，連街尾順嫂都俾人問要唔要貨，唔怪得一開波就變成蛋散啦。
天安由毫七子炒上嚟批股，中國網絡高價配售天安，套現2.18億元，認真肥仔，可惜隻股噚日停牌，否則可以追入中國網絡短炒賺番筆，或者可以抵銷買錯天安所引致的虧損。
確利達（1224）證實大股東渝港（613）減持2億股，每股作價0.17元，但股價不受影響，小量買盤已支持股價逆市上升5.8%，收0.201元，但成交僅222萬元，反映此股貨源歸邊，或接貨者並不急於出貨獲利。
文傳（343）近排愈炒愈有，噚日股價勁升24%至0.49元，成交高達2.62億元，睇嚟炒家真係出番晒嚟。
阿 虎