小紅去一間位於全港人流最旺商場之內嘅××春飲春茗，本來就冇乜大期望，因為新春團拜旨在與朋友同學聚舊，食物是否可口實屬其次，馬馬虎虎就算嘞，大凡人多場合，酒樓一定係以行貨待客，想食靚嘢就要十個八個人去搵間正嘢啦。
唉，唔通大路貨都因為掛住做自由行遊客而拉低晒水準？小紅食到不是滋味之餘，最妙還是攞到一隻崩咗一半嘅匙羹。上翅之時，夥計派碗碟、匙羹，係崩嘅，筷子座又崩咗半邊，夥計居然視若無睹，要出到聲先至識換。小紅覺得呢間××春嘅服務態度有啲匪夷所思，照計夥計分碗碟之時，發覺有崩爛嘅就會立即拎走啦，點敢捧上枱奉客？下次容乜易拎個崩口碗嚟裝飯畀人客？
小紅與左丁山研究：「孰會至此？」一個可能答案係：去年下半年自由行帶來大量食客，生意好晒而老闆唔肯請多啲人（因不敢肯定生意是否會長期好景），於是夥計做到氣咳，眯埋眼見到崩匙羹都唔理。此答案有旁證㗎，小紅嘅表妹喺尖東返工，公司做內地成品出口，生意好到不得了，小紅表妹經常做到夜晚十一點至放工，雖然公司畀番的士費，啲夥計仍然冇晒癮，但老闆係唔肯請多啲人，你唔制晚晚開夜工呀，大可辭職。目前仍然冇人敢辭職不幹，但小紅表妹話如果經濟再好啲，有其他公司搵人嘅話，佢唔跳槽先至奇。目前老闆盡量push啲夥計，遲早會反彈。