貿發局減人工，八方一早喺總裁施祖祥嘅春茗上聽聞過，施兄好偉大咁話，呢啲咁唔討好嘅舉動，都係由佢出手，否則接任人林天福一上位，就要做醜人，唔係幾公平。
米高．施不愧係肥彭睇中嘅人才，做事有規有矩而且有道德承擔，為此佢特別寫咗一封信畀啲傳媒朋友，解釋貿發局減薪嘅來龍去脈。原來貿發局九七年同公務員嘅薪酬架構脫鈎，重答應會定期做檢討，結果顧問公司完成研究，發現有七成半嘅員工薪酬同市場差唔多，其餘高咗嗰啲最高減一成，假期同房屋津貼較優亦要減。
施祖祥認為𠵱家係問責年代，公營機構更有責任確保薪酬同市場水平同步，故貿發局要面對現實建立一套客觀同可持續嘅制度，每年自我檢討一下。
施祖祥係一位有心人，總想樹立個好榜樣，總算冇枉肥彭栽培一場。不過，佢啲舊同袍似乎點極都唔明，王永平重要多做工夫嘞。
傳真︰2623-9278
電郵︰