鄭中基因為拍《行運超人》個搞笑形象成功咗，佢經理人黃柏高（Paco）即刻為佢開咗部《龍咁威2003》，估唔到又俾佢搞掂，兩套戲都好收得，分別成為上年度十大賣座港產片嘅第四同第十位。
最近，Paco又諗住幫佢開套《我要做Model》，女主角就搵咗林嘉欣，呢套當然係搞笑戲，鄭中基喺部戲度會做個超級Model，咁當然會有好多唔同嘅造型，以配合佢嘅搞笑本色，當中一定唔少得佢最擅長扮女人嘅絕招啦！
近年嚟鄭中基已經少咗好多醉酒鬧事嘅負面新聞，而且同女星嘅緋聞亦都少咗，睇嚟佢已經生性咗好多，想重新再追番楊千嬅，應該有望成功。馮仁昭聽聞鄭中基真係好鍾意千嬅，佢哋甩拖後，鄭中基好努力箍煲，𠵱家雙方關係都唔錯㗎！
蔡依林將推出新碟《海盜》，今次為咗令樂迷有耳目一新嘅感覺，蔡依林重專登搵嚟喺日本幫安室奈美惠同濱崎步搞造型嘅著名設計師渡邊裕康，幫佢重新包裝，今次佢總共使咗約七十萬港紙，即時將蔡依林包裝成仙女一樣登場，不過睇落佢真係好似步姐喎！
𠵱家啲歌手真係愈嚟愈鍾意搞姊弟戀，好似吳浩康噚日到港台接受訪問，被主持人問到佢同師姐鄭希怡（Yumiko）不時出雙入對，怕唔怕會搞出真感情時，佢就竟然話：「唔怕，點解要怕，暫時對佢重未有感覺，冇追佢嘅衝動，不過我鍾意大過自己嘅女人，如果真係追佢，就一定要打多啲籃球先，因為佢太高嘞。」
噚日有地產界消息傳出，話趙世光嘅紅顏知己譚玉梅，噚日啱啱以一千三百八十萬成交賣出佢喺中半山地利根德閣豪宅，譚玉梅喺○一年以一千三百六十五萬買入呢個面積有成三千幾呎嘅低層單位。經過一輪地產低迷影響，佢就趁住𠵱家經濟好番少少，可以用高出當年十五萬嘅價錢賣出，已經算幾有眼光啦！
唐季禮為咗之前有單講佢拋棄懷孕女友搞到個女仔要跳樓重變成殘廢嘅報道，日前喺上海見記者，佢話要捍衞個人清白同名譽，記者會後佢即刻去咗上海市第一中級人民法院交民事訴狀，將最先登呢段報道嘅杭州報章同成都某報兼寫呢單料嘅作者，齊齊列入被告名單，要求佢哋公開登報道歉，賠償經濟同精神損失。如果單新聞真係假嘅，唐季禮要追究責任都係啱嘅。
