海外試車:<br>台灣實地測試第2代Freelander爛地王

海外試車:
台灣實地測試第2代Freelander爛地王

英國越野路華車廠推出新一代Freelander,本地代理乘時邀請咗傳媒前赴亞洲首個建於台灣高雄墾丁嘅LandRoverExperienceCentre試新車,無論On-road或Off-road表現都一流!

記者、攝影:李勤

4種刁鑽地形實地感受
1.涉深水坑?強項吖!
響深坑中激起浪花好刺激,簡直有衝浪嘅感受!

2.落石階?如履平地喎!
駕車拾級而下跟用腳行可謂截然兩樣,若然唔想響車內顛簸彈跳的話,就要好好控制迫力好好落斜喇!

3.過橫木階梯?勁避震!
一排橫列木階,高低參差兼距離不一,但坐在座椅上感覺舒服,避震柔韌性奇佳。

4.玩搖搖板?都得!
想順利通過懸空嘅搖搖板,當踏過中心點車首突然俯衝而下,感覺好拋!

一直以來,英國越野路華旗下嘅車系,均以高性能越野性見稱,主打車以Defender、Discovery同RangeRover為人所熟悉;惟廠方為要爭取年輕一輩嘅用家,早前落實推出全新Freelander車系,果然吸引到唔少有品味嘅年輕車迷所青睞;及至最近第2代嘅Freelander,一派時尚獨特味道,更較前突出㖭!

頭泵把連防撞架最In
新款Freelander外形及尺碼跟上一代相若,惟骨子裏卻滲入有不少新車元素,其中,一對FamilyLook造型嘅雙圓高聚焦大燈,外觀吸引趨時之餘,全新一體化頭泵把連防撞架設計,既紮實又不失時尚感,而全新獨立尾燈配搭,以及四輪新款16吋跑車合金胎軨組合,亦予人成熟剛勁嘅RV風範。

造型大變身

■第二代換上全新鬼面罩連一體式防撞架。

■全新雙圓高聚焦車燈,匹配原廠霧燈配搭,型!

■全新獨立尾燈設計,既清晰又富安全性。

內櫳似足轎車款
外形吸引之餘,車廂鋪排十足轎車款,全新皮椅設計,重有新鋪排嘅中控台、獨立圓表同波箱陳設,皆有豪邁High-tech嘅觀感。除原廠高級6碟CD音響另附軚盤遙控操作外,香港嘅五門版本,重係HarmonKardon組合,響寬敞空間享受涼快冷氣之餘,車內四門電窗、門邊電鏡連電天窗,以及前後獨立照明,還有四周多個儲物匣,就手又好用!

■全新編排車廂布局豪邁吸引,帶出有近似轎車貴氣。

■5前速半自動波箱配搭HDC按掣,轉檔利落暢順。

■駕駛席門壁備有全新電窗開關,重有多個雜物匣。

■尾排可整幅收摺起,尾廂容量倍增。

■全新編排中控台,分別置有原廠高級音響及冷氣。

5前速半自動加速利落
新車沿用一台2.5公升V6偈,匹配至新5前速半自動波,起跑加速都好利落,而全新懸掛配搭,予人穩妥又富支持力外,On-road走彎嘅循迹性高。難得一部針對全天候個性嘅RV身上,乘客亦能感受有出眾車廂隔音效果。
此外,部車本身除備有恒式四驅,重有主動式ETC系統,以及下坡用嘅HDC裝置,還有四輪高效能碟煞、ABS連EBD組合,予人更放心又可靠。

亞洲首個越野中心可試多款車種
全亞洲首個國際級越野中心,位處台灣高雄屏東縣恒春鎮內,設有17道英國原版設計嘅Off-road越野關卡,以及符合國際標準嘅越野場地,供學習各種Off-road技巧之餘,重有機會駕駛多款越野路華車種,挑戰個人極限㖭!有興趣嘅車迷,欲到台灣旅遊,又想一嘗Off-road滋味的話,不妨致電08-8869999查詢。

記者評語:設備升晒級
新車變得時尚有型之餘,設備重全面提升,更具玩味享受外,一份越野性能剛柔兼備,完全表露出全天候個性來。

■越野路華車廠台灣區總經理MartinBaker。

■一班本地汽車傳媒,在中心初嘗Off-road滋味前,正留心聆聽導師講解細節。

越野路華Freelander五門規格
引擎:2497ccV6DOHC
馬力:177ps/6250rpm
扭力:24.5kgm/4000rpm
傳動:5前速半自動波,恒式四驅
懸掛:(前)麥花臣支柱(後)多連桿
制動:(前)透氣碟(後)碟式(ABS)
輪胎:215/65R16Michelin4×4Synghrone
尺碼:4437×1809×1828mm
軸距:2557mm;車重:1562-1650kg
0-100公里:10.3秒;極速:182km/h
平均耗油:12.4L/100km
新車售價:$318,000
查詢:越野路華香港(27132383)

■新車沿用一台2.5公升V6偈,匹配最新5前速半自動波箱,無論On-road或Off-road同樣演繹出色。