無喇喇好多人要審查愛唔愛國，搞到香港變咗個「謾罵港」，曾憲梓發作完畢，腦科醫生鄔維庸又試谷乜上腦，竟然失驚無神侮辱香港人係狗，話香港人食咗太多政府派嘅狗餅！
鄔某激起民憤，擒日被迫「道歉」，不過另一個侮辱大律師「騎劫民意」嘅邵善波重拒絕認錯。請問鄔維庸：你自己係咪香港人？用咁惡毒嘅字語嚟侮辱呢個生你、教養你嘅地方，即是用粗言穢語罵番自己個老母，人性何在，情何以堪。美國總統布殊若果夠膽話美國人係狗，民主就等於派狗餅，佢會即時冧台！
面對鄔某嘅謾罵，廢董固然龜縮，特區政府冇人夠膽公開駁斥。先嗰輪，愛國老人徐四民大罵港台《頭條新聞》，話港台主持人將江澤民形容為大狗，董建華就係細狗（港台事後澄清，經調查並無咁嘅言論），徐老都極之激動，話香港電台侮辱國家領導人，好嘞，𠵱家鄔維庸侮辱晒包括土共左民及民建聯在內嘅六百萬港人，又唔見徐大炮出來駁斥？
土共偽愛國人員全力鼓動謾罵文化，搞到連英國劍橋畢業、一向有官場紳貴之稱嘅教統局局長李國章，亦透過傳媒同代表大學教職員嘅高教聯組織展開罵戰，炮轟大學學者「只顧利益，不管教育質素」。啲做官嘅、有學識嘅大人係咁，又點怪得中學生變本加厲，大人互罵，中學生就暴力互抽？身為愛國教育事業龍頭嘅香島中學學生喺天水圍商場撞着黑幫，當黑幫青年詢問佢哋係隸屬十四號定和勝和，香島學生拒絕回答，重由書包攞出利器，將對方拮傷。
呢件事，黑幫人物有眼不識泰山，當然係錯咗先。佢哋唔知道所挑釁緊嘅中學，係由我祖國共產黨政府資助嘅，講到幫會文化，正一係格食格，天水圍黑幫可謂唔識死。至於幾個香島仔，郁親就攞張剪刀出嚟插人，亦係唔啱。作為愛國學生，對於呢一小撮思想落後嘅綠林好漢，應該首先進行耐心說服教育，曉以愛國大義，話畀佢哋知，要做一個自食其力兼頂天立地嘅中國人，學習江主席三個代表論以及胡溫新三民主義，盡力感化到佢哋放下屠刀，向祖國認錯。
香島中學校長楊耀忠，上星期至大大聲咁教訓董政府，話應該加強全港「愛國教育」。嗱，𠵱家八方就免費同佢教學生，等佢間學校啲學生知道乜嘢叫「愛的教育」。根據我國儒家精神，正所謂：修身、齊家、愛國、平天下，若然未識修身，吓吓掹剪刀，唔自愛，又點樣愛國呀，愛國學校辦成咁，又點怪得啲家長懷念殖民地，送晒仔女去英國寄宿呀，係咪？
所以香港呢幾年，就係有咗呢啲極之唔好嘅歪風囉，謾罵、詛咒，郁吓就盤人哋後台係十四號、和勝和定係美國勢力勾結，腦科醫生係咁，愛國學生又係咁。
廢董就潛水變海龜，剩番個煲呔，最肯做嘢，點知又遭到胡溫矮化、土共排擠，搞到家嘈屋閉，留唔住人才，連中大醫學院院長鍾尚志都大志難伸，話留喺香港，想做嘢都俾人阻，寧願去未開化嘅巴布亞新畿內亞做教授，你話退化為中國嘅沿海普通城市嘅特區，又點會唔日日見鬼？
傳真︰2623-9278
電郵︰