重有十幾日就到財爺唐英年交上任以來第一份功課，呢排人人都想撬開佢把口，探吓財政預算案嘅內容，唐唐唔似松松，預算案全文可以由《文匯報》曝光，堅持守口如瓶，不過噚日唔知有心定係大意，漏咗口風。
唐唐噚日出席一個公開論壇，除咗乘機為自己之前喺安民面前任由安民話「愛黨即愛國」而不加阻撓而補鑊外，又講多咗句，話會喺預算案中畀市民睇到，政府有決心控制公共開支，目標係喺○八至○九年，將公共開支佔本地生產總值嘅比率，降至百分之十七。
之前一直講緊，話如果港府要做「小政府」，至少要將公共開支佔本地生產總值嘅比例，降到兩成，但一講削開支，多個部門已經牙痛咁聲。今次忽然彈咗個百分之十七嘅講法出嚟，好多記者即刻追住問重可以點減。唐英年卻好似講古佬咁，製造懸疑，只話等到三月十日佢先講。
傳真︰2623-9278
電郵︰