啱啱至喺非洲國家盃打入決賽嘅摩洛哥，轉頭又要應付周中國際友賽主場對瑞士。於是摩洛哥諗住派副選，甚至國內球會應戰敷衍對方；或者瑞士想爭吓國際排名，見對手由國家隊變成球會，就威脅拉隊走人唔踢。
為咗息事寧人，摩洛哥最後都派副選上陣，令瑞士嘅對手仍然係一支國家隊。不過賽前也文也武嘅瑞士最後輸一比二，連人哋副選都打唔贏，真無面！
最慘都係一眾賭客，事關初盤摩洛哥讓平/半，當傳出佢哋可能搵支球會出賽，下盤即被追捧到瑞士掉番轉作客讓平/半。呢鋪莊家又賺唔少啦！
雲達不來梅前鋒艾列頓日前接受德國傳媒訪問時話，如果佢隊波攞到今屆德甲錦標，就會同佢同居六年嘅女友羅莎麗喺主場韋沙球場舉行婚禮，重會請晒所有球迷觀禮。但我求大俠就收到風，話佢其實唔太想結婚，只係頂唔住女友係咁迫佢；若然係真嘅話，咁不來梅就大鑊嘞！
前晚國際友賽，球迷會發現國家隊新戰衣亦分分出籠。贊助荷蘭同捷克嗰邊球衣製造商玩玩新意思，胸前號碼用個大圓形圍住，有球迷話好似美式桌球平面咁。我求大俠就覺得幾特別，同埋真係方便球證遠距離望球員時，正面睇唔到個樣，都睇到個冧巴，事後先畀黃牌都方便啲！
比利時友賽法國場波半場時見到施丹由更衣室出返嚟時，同場邊已經掛咗靴好耐嘅比利時一代名將史斯富寒暄，重揸住件波衫影相，睇嚟係同一啲慈善嘅活動有關，但係收費台兩個主持就唔知嗰個人原來係史斯富，跟住鏡頭影去看台上嘅韋莫斯，但佢哋又認唔出，真係貽笑大方。
唔知係唔係老馬特別好火，湖人老將披頓近排頻頻喺場上惹禍，多次俾球證踢出場，好似噚日作客勇士打到第三節時，佢突然同勇士嘅奇勒斯頓大打出手，最後需要勞動兩名球證將佢哋㩒住喺地下先至肯就範。其實披頓都成三十幾歲人，好心佢收火喇，唔為自己都為吓隊波着想！