近排商舖市道大旺，投資者都賺大錢，不過，佢哋大都低調，甚少露面，所以身份神秘。
美聯旺角商舖部旗艦店噚日開張，大部份活躍舖位投資者，都畀面出席。難得聚首一堂，當然要拍番張大合照。
席上有過去兩年積極掃貨嘅大鴻輝負責人梁紹鴻、小巴大王馬亞木、舖王鄧成波、投資者羅家寶、永倫總裁倫志炎、合發投資董事葉兆球、從事飲食業務嘅黎永滔、專營影音器材嘅李耀華等。
難得見到咁多資深舖位投資者，蘭西即時問吓今年舖市點睇。佢哋齊聲話「好！」可惜都事務繁忙，未能詳談，就匆匆離開。
至於美聯新舖，二萬二呎，有九十名員工，九個組別。
物業管理公司都要趕上潮流，搞好環保。
好似新地旗下康業及啓勝，老早已經喺屋苑裏面搞環保。近年重不斷攞獎㖭。
啱啱喺香港環保企業獎頒獎禮上，佢哋管理嘅元朗采葉庭同沙田帝堡城，就攞到環保物業管理獎（私營房屋）金獎。
至於攞到各類優異獎嘅屋苑，重有中半山曉峰閣、葵涌華景山莊及跑馬地禮頓山等。
恒隆近排推出嘅維港海景新盤君臨天下，市場矚目。
噚日，恒隆執行董事吳士元向傳媒大讚西九龍，話未來會愈來愈方便，今日睇到嘅西九龍發展只係皮毛，叫大家對該區要有信心。
除咗講物業發展同賣樓，吳士元又自爆係攝影發燒友。
聽佢講，以前佢屋企有幾間房，由於鍾意影相，專登整咗間黑房，方便曬相。用嘅相機同菲林重十分講究㖭。
聽起嚟，佢嘅攝影技術，唔比專業攝影師差噃。唔知幾時有機會睇到佢啲大作呢？
樓市暢旺，發展商開盤，定價更加謹慎。
事關賣得貴，會滯銷，賣得平，以前怕蝕底，𠵱家重怕俾人話掀炒風。左度右度，搞到開盤遲遲無期。
除咗代理同買家心急樓盤幾時開售外，計劃今年加強樓宇按揭業務嘅交通銀行，原來早已摩拳擦掌，四出搵發展商傾合作。
交銀去年一手按揭業務市場佔有率，僅得一點五巴仙。交銀助理總經理李紹基話，希望該行今年批出樓宇貸款，宗數及金額都有一成半增長。
總之樓市旺，攞多啲生意做一定有着數。
蘭西
電郵地址：