經紀黃推介的魏橋紡織（2698），雖然升唔夠1%，但在跌市中表現咁硬淨，已經有交代。小初噚日見到保母密密掛牌買入，都算好有誠意。經紀陳則叫小初唔好心急，等下個星期尾公布業績時，自會見到真章。
經紀陳另外推介一隻高風險股畀小初，就係活力世界（8100），噚日最高見過0.091元，收0.085元，冇起跌。經紀陳話，如果小初嫌基金股升得慢，可以考慮此股，但就要縛好安全帶，兼夾有隨時跳車的心理準備，總之就係nopainnogain。
活力世界以往屬大凌集團（211）一系，表現大家有目共睹，唔使小初多提。不過，舊年換過主要股東後，股價表現已經好唔同。上個星期公司以先舊後新方式，每股6.3仙，配售1.5億股，集資淨額775萬元，復牌之後，股價表現硬淨。
經紀陳話，據講公司籌集資金，係為未來新收購作準備。大凌雖然仍持有一定數量的活力世界，但已經不斷在市場上減持，所以唔會構成太大影響。
慕容小初