「大隻標」想埋花園街波鞋舖老闆堆，佢成日話要幫嗰度啲波鞋舖轉型，成為香港版的MITA（上野最出名的波鞋散貨舖，幾年前同NewBalance合作，成功轉型為潮舖）。不過，花園街班老闆對搞潮流嘢興趣不大。只係有個別老闆，特別地過江到銅鑼灣，開間潮流舖畀下一代學吓做零售生意，但形象仍然爭啲。「大隻標」話花園街嗰頭風水好，好多老闆做到發晒達，唔少波鞋舖間舖都係自己物業，做起生意上嚟都靈活過人，磧吓貨都唔使驚。家陣波鞋街啲地舖租金都唔平，未有自由行之前，每月閒閒哋都超過十萬，有咗自由行之後，成個旺角啲地舖價位立即升晒，如果唔係自置物業做零售，壓力認真大。「大隻標」話：「最近『泉章居』個位賣咗，作價九千幾萬，原來被同區一間相機舖接咗貨，呢間相機舖係老字號，非常低調，唔做宣傳，全靠口碑，以前重喺舖內包埋伙食，午飯掛個『用膳時間』嘅牌出嚟唔做生意。估唔到佢哋都咁勁！」
主持人：大食Jack
八卦熱報：
