香港fans一向都鍾意睇日本勵志電影，最近由田中麗奈主演嘅新片《Drugstoregirl》，啱啱先喺日本上映，我羅拉就偷雞睇咗先。《Drugstoregirl》被喻為係女版《五個撲水的少年》，其中《五》片入面竹中直人嘅鬼馬教練角色，竟然由嬌滴滴嘅麗奈飾演，不過一樣笑料十足，睇完成個人心情都靚晒。
麗奈喺戲入面飾演一個極之喜歡玩冷門運動長曲棍球嘅女仔，儍頭儍腦嘅佢，有一次如常上男友屋企，點知佢去廁所時，竟然發現男友同另一個女仔喺浴缸鴛鴦戲水！呢個衰格男友俾麗奈發現偷食後，重居然敢大聲話：「大佬呀，冇男人會鍾意你呢啲完全冇女人味嘅女仔㗎！」㷫到麗奈即時一棍扑落去！
經此一役，麗奈誓要創一番事業威畀個衰人睇，咁啱佢做兼職嘅藥房，有一班騎呢阿伯好鍾意偷睇佢着迷你格仔裙打波，於是麗奈就夢想可以訓練佢哋成為一支好man嘅長曲棍球隊，結果係點，當然係笑料百出啦。