話明唔同畢仔合作<br>珍妮花與賓佬糖黐豆 作反

話明唔同畢仔合作
珍妮花與賓佬糖黐豆 作反

畢彼特(BradPitt)個靚靚老婆珍妮花雅麗斯頓(JenniferAniston),前日同搞笑演員賓史迪拿(BenStiller)到咗倫敦出席佢哋嘅新片《情場算死草》首映禮。珍妮花除咗着咗一條露膊嘅紅裙出嚟行紅地氈見fans之外,之前更着咗另一套黑色低胸裙宣傳,主動捉實賓佬隻手攬住自己條腰,認真搏命!

全力進軍影壇
珍妮花到達會場行紅地氈嗰陣,已經獲得好多fans迎接,佢因為西洋處境喜劇《老友記》而深入民心,但佢喺套劇完結之後,有意全力喺影壇發展,佢喺首映接受訪問時話:「我想演出多啲好似喺《TheGoodGirl》入面嗰啲可以發揮演技嘅角色,不過暫時唔會同老公合作住。」

幫老友或演劇集
雖然珍妮花決意將時間放在電影方面,但佢亦唔排除會喺《老友記》麥尼賓(MattLeBlanc)獨撐嘅新劇《Joey》客串演出,佢話:「如果阿麥出到聲,我會樂意客串吓。」
當日名模歌地亞雪花(ClaudiaSchiffer)同靚仔名廚JamieOliver都有捧場。冇老公同行嘅珍妮花,宣傳嗰陣更主動向拍檔賓佬投懷送抱影相,非常親密,謀殺咗記者唔少菲林,相信入行多年嘅畢彼特唔會因為咁而呷醋嘅!