正當新一屆瑞士日內瓦車展舉行日期逐漸逼近，來自世界各地嘅多家車廠都不約而同發布將於會場上展出嘅新車款，就好似來自德國嘅平治及寶馬汽車咁，亦於日前公布有關新車嘅資料；當中最惹人注目嘅，相信會係走高性能路線嘅平治C55AMG！
響推出Facelifted新版C-Class嘅同時，平治廠方原來同時亦研製咗走高性能房跑車路線嘅C55AMG型號，除會隨新C-Class於4月登場外，又會有四門及旅行車型號供選擇。
話說回頭，全新C55AMG造型明顯比普通版本來得更具吸引力，不但換裝上全新鬼面罩及頭燈外，車頭泵把及整流器亦屬新配搭，再襯以全車原廠AMG跑車包圍及18吋跑車合金胎軨組合，完全一副跑車格！
至於車廂方面，廠方就特別為新車加入跑車化鋪排，除有承托力甚豐嘅跑車座椅、鑲有銀白面板裝飾嘅中控台外，重有多項設備遙控鍵嘅三幅式跑車軚環，同埋刻度達320km/h嘅跑車表板等等，當然唔少得重有多個安全氣袋組合，以確保車上乘客安全啦！
不過全車至吸引嘅地方，相信會係一台能輸出367ps/5750rpm馬力，同埋52.0kgm/4000rpm扭力嘅5.5公升V8引擎，除輸出充裕外，加上一套5前速半自動波連軚盤轉檔按鍵，轉換波檔盡操控在指間，與此同時，經過強化嘅底盤及制動配搭，循迹性及制動表現更叫人留有深刻印象，而轉向比率較前直接多7%嘅轉向系統，操控感十足。
