大市牛皮，在高位整固，芬佬仍然係好有信心，話唔使怕，大市重有排升。不過，佢哋話今年上升路途曲折，波動好大，話唔定有一兩次較大幅度的調整，會有一千幾百點，但反覆再上，恒指今年內應可見15800至16000。
二三線股升勢，既急且勁，文化傳信（343）在4日之內，由0.3元升到上0.5元，升幅逾60%；另外隻實達科技（706）又係咁勁，一日之內，由0.19元彈上0.35元，升幅84%。二三線股股價好多都係大落後，一有資金埋位，就會脫胎換骨，好似文傳，噚日成交大增到5.58億股，總值2.62億元，動力咁強，絕唔簡單。文傳默默耕耘幾年，今年出現轉捩，開始有收成，小股東飲得杯落。
其實，目前好多工業股都好抵買，好似權智國際（601），芬佬就睇得好好，亦揸咗唔少，家吓股價1.11元，今年估計會上升60%，目標價係1.75元。
集團去年9月推出智能手機，已成功打開歐洲和中國大陸市場，最新的發展係進軍美國市場，目前正同三家最大的流動通訊營運商傾緊，若然取得定單（最快今年第3季可落實），則智能手機的盈利將會倍計上升。
美國電訊營運商例如Cingular、AT&T同T-Mobile都有龐大的客戶網，例如Cingular的客戶就有2300萬人，佢哋通常都會以提供手機優惠的方式拉客，而權智的智能手機，在價格方面就可以畀佢哋有更大的空間。同時，美國市場較流行Palm操作系統為平台的PDA，採用Palm的智能手機，在競爭方面無疑佔有較大優勢。
權智計劃1年生產40萬至50萬部智能手機，若然取得美國通訊商嘅定單，相信一張合約就會超過成年嘅產量，呢方面嘅發展會好具爆炸性。
另外，權智另一項主要業務ODM亦有強勁增長，04年度（3月年結）此方面的營業額估計已有6億元，令全年盈利上升到1.2億元（不計特殊項目收益6190萬元），05年度預計可再升到1.7億元，每股盈利14仙，12倍PE計，股價已可見1.68元。
郭兆誠