SONYDV兩大系列生力軍

嗰邊廂DC努力推高拍片質素；呢邊廂DV亦緊守防線，不斷提高CCD解像度，令到拍片同影相都有高解像度。SONY就剛剛一口氣發表兩大系列、合共9部新款DV，除高解像度同蔡司靚鏡外，重加入實用軟件㖭。

記者：徐影龍

DCR-PC系列共推出兩款新型號，其中以PC190E最搶眼，除107萬像素CCD外，亦配備蔡司Varoi-Tessar靚鏡，影像質素有保證。而其2.5”屏幕夠大之餘，獨特技術亦令屏幕較清晰，就算遇到大白天、雪地等高對比嘅情形都唔怕。不過最特別地方，就係加入「HandyCamStation」機座，有齊i.LINK、USB、AV等插頭，可一邊喺電視翻睇外，重可充埋電，夠晒方便。

HC系列走輕巧路線
另一個DCR-HC系列，乃取代舊有嘅DCR-TRV系列，走較大眾化路線。其中HC40/E型號就跟PC190/E一樣，配備107萬像素CCD、蔡司鏡及2.5”大屏幕，不過仍可保持輕巧機身，而機身更有銀或藍色供選購。最後一提係9部新款DV中，都跟機附送全新嘅影像編輯軟件《PicturePackage》，方便用家簡易製作屬於自己嘅影像作品，再製成VCD都只係幾分鐘嘅時間。