港股直迫14000大關，由於此關阻力極大，當然難以一舉升破。
不過，內地社保基金若正式來港買貨，情況可能唔同，雖則話社保基金可能只有40至50億元投入港股，以港股每日成交金額計，要消化呢批資金可能只需1小時，但唔好忘記，社保基金係整個北水南調的開始，日後唔排除有大量北水，如保險資金等流入港股，然後會是QDII，總之內地資金一定會繼續來，恒指14000大關是必破無疑。
恒指噚日收報13928，升112點，主要由滙豐（005）等大藍籌帶動，全日成交接近226億元。
生命科技（1180）噚日上午未有動靜，但下午則急升，以全日高位0.202元收市，升幅13.5%，總算冇令大家失望，成交亦相當可觀，達到3023萬元，為近期罕見，此股似乎開始為認股證下周五正式掛牌做準備。
確利達（1224）有4宗大手成交上板，合共2億股，每股作價0.17元，大幅低於前日收市價0.193元，折讓達11.9%。市場繼續傳大股東渝港（613）減持，不過傳聞對股價影響不大，全日只跌1.6%至0.19元。黑客話，據聞渝港上次減持嗰手貨，已由實力人士接下，稍後或者有好戲睇。
早前大行以樓市暢旺為理由，紛紛調高美聯（1200）投資評級及目標價，點知發展商認為現時唔太需要依靠代理售樓，施壓要求減佣，令美聯股價大跌8.5%至2.675元。
現時樓市由一手樓帶動，二手樓交投仍然呆滯，一旦新盤大幅減佣，美聯都咪話唔傷。。
阿 虎