著名時裝潮流雜誌《TheFace》上一次選嘅時裝界一百位最有權力人士排名榜，萬人迷碧咸（DavidBeckham）憑住佢嘅敏銳觸覺成為潮流指標，一上榜就位列第九位，但係只不過事隔年半，《TheFace》最近再選今年一百大，碧咸已經榜上無名，取而代之係佢個仔布魯克林（BrooklynBeckham）同老婆Victoria，認真夠諷刺。
由於《TheFace》係英國雜誌，碧咸上年轉會西班牙皇馬後，都好少返家鄉，自然冇乜曝光機會，大家見佢老婆同個仔重多，所以被踢出榜，都合情合理。今次布魯克林至醒，新入榜排三十七位，比排八十七位嘅媽咪足足贏咗五十位，雜誌話布魯克林係兒童版嘅姬蒂摩絲（KateMoss），佢今日着嘅衫，第二日所有五六歲嘅小朋友都會跟住着。而真嘅姬蒂就由一百位急升至第七位。
新入榜名字中，名媛ParisHilton影響力驚人排二十九，出爐影后施嘉莉祖安遜（ScarlettJohansson）排三十一，佢更被喻為係荷李活嘅少男殺手。而早排縮胸嘅彭美拉安德遜（PamelaAnderson）將會推出自己品牌嘅時裝同香水，所以都有得排九十六位。