經紀黃早前推介過紡織股魏橋紡織（2698），話貨源被芬佬悉數坐晒咁滯，故此有望再升。之後隻股果然升完又升，總算不負所望。魏橋入選成為國企指數成份股後，升勢再下一城。
經紀黃話，魏橋將在下周五公布業績，據講同樣不會令人失望，估計與招股書預測相若，甚至會好些少，可短炒一轉，不妨密切留意走勢。
魏橋去年上市以來，一度高見13元，後來受棉花價格高企困擾，股價回落，曾低見8.30元。不過人棄我取，包括金手指在內的幾個大芬，密密係咁添食，保母百記的買盤亦頻頻出現，終於令隻股重返高位，噚日平收12.75元，距離高位13元不遠矣。
經紀黃話，魏橋雖然號稱全國最大紡織企業，但負債亦大，當日上市集資所得，據講唔少拎咗去還債。雖然重有個幾月先至上市夠半年，但在芬佬界流傳，隻股有批股集資需要，因此有炒高誘因，只要基金唔沽貨，股價仍可再升。
慕容小初