職業足球員總係予人讀書唔多嘅感覺，但凡事總有例外，而阿仙奴嘅韋拉就係最佳例子。
大多數球迷或者只知道韋拉有「大肉腸」或「長腿先生」嘅外號，但原來佢除咗有「身材」之外，重有個好掂嘅腦袋。佢喺接受訪問時咁講：「我喺讀書時讀過會計，而且重攞埋張文憑；除咗會計之外，我亦好鍾意數學。」雖然佢做唔成會計師，走咗去做職業足球員，但我求大俠就認為佢學過嘅一啲都冇浪費。
係人都知道佢係世上最佳防守中場之一，落腳鏟波又準又快；計我求大俠話，多多少少同佢計數叻有關。重有就係，啲人話計數叻嘅人個腦通常轉得快啲，這亦都令到佢可以喺場上一眼關七。聽講新加盟阿仙奴嘅雷耶斯同個文盲冇乜分別，如果韋拉有時間，不妨教吓呢個師弟計數，等佢有一技傍身。
奧高查早前同傳媒講，話佢擺晒啲錢喺尼日利亞一間銀行，點知嗰間銀行有問題，搞到佢擔心啲錢會唔見晒；不過，佢算好彩，事關尼國總統奧巴桑喬應承幫佢追番一百萬美金。講真呀，奧高查雖則幫唔到尼國攞非洲國家盃，但就踢得好好，重當選最佳球員，梗係抵幫啦！
被認為潮流指標嘅「萬人迷」碧咸，原來都有失手嘅時候，事關佢𠵱家個長頭髮髮型，就俾英國傳媒笑佢似稻草人，嚇到啲雀仔唔敢飛近佢身邊；我求大俠雖然唔係佢嘅fan，但亦認同佢之前梳嘅雞冠頭同武士頭好型好好睇。如果佢唔想嚇走晒啲fans，睇嚟係時候去整整個頭。
華倫上個禮拜日對皇馬喺完場前俾球證奧利華判罰一個問題十二碼，搞到唔見咗兩分，佢哋嘅股東同球迷條氣重係好唔順，計劃將事件帶上法庭，告奧利華有顯著疏忽行為同破壞公眾秩序。雖則華倫就算告得入亦攞唔返兩分，但起碼攞返個公道，所以我求大俠亦好贊成佢哋咁做。
三位有份參加周日明星賽嘅NBA球星奧尼爾、艾華遜同阿達斯，咁蹺都缺席周一操練；奧尼爾初初話唔舒服，但係噚日佢喺贏拓荒者個場波鬼咁生猛，賽前重同記者講啲搞笑藉口解釋自己唔操練原因。既然艾華遜同阿達斯都要罰喺周一場波冇正選打，奧尼爾睇怕都要受罰囉！