自從江澤民過年走落嚟廣東，同藏族人士一齊跳舞亮相以後！阿董貼身學得快，佢噚日老遠跑去大埔出席香港教育學院賽馬會小學創校典禮，同十幾個小學生打成一片，一齊玩遊戲、講故事，重手拖手跳舞㖭。
話說董伯伯同馬會主席夏佳理一入到課室參觀，就俾班小學生圍住，猛咁用英文問佢覺得間學校點，董伯伯梗係話Good啦。點知班小學生講到興起，要伯伯同佢哋一齊跳舞。阿董同夏佳理都好識做，即刻企起身拖住學生隻手、印印腳跳咗幾吓，搞到啲學生鬼咁開心。但八方現場睇到老董嘅舞藝，真係有幾分似佢嘅施主江主席嘅風格喎，唔信呀，有相為證呀。
同學生玩完之後，老董走去主持典禮，聽完台上兩個操流利英語同廣東話嘅小主持講開場白後，佢猛話香港教育有希望。夏佳理亦覺得兩個學生有前途，可以去考公務員㖭。
（圖）董伯伯同一班天真無邪嘅小朋友手拖手跳舞，玩得好開心。
區民傑攝
傳真︰2623-9278
電郵︰