愛國口水大混戰又有新回合進展。前政務司司長陳方安生講嘢，話若然中國嘅聲譽高，自然就多人會愛國，佢又話香港人都係好愛國，政制改革係另外一樣嘢，唔好撈埋。
另一方面，陳太接班人曾蔭權，據某新進親中報章透露，今次上京面聖，表現良好，獲得國家讚賞。
陳太落咗台之後講嘢，愈來愈一箸夾中。冇錯，中國若果國際聲譽高，咪話香港人爭住愛，連越南人同韓國人，都會爭住認自己係中國前藩屬，要求加入大中華共榮圈㖭。
不過可惜，當中國啲人出到世界，毫無尊嚴，例如，爭住偷渡去英國，由人蛇集團操控，喺海邊採埋啲唔知乜嘢嘅貝類，一個浪頭冚過嚟，浸瓜十幾廿個人。一個貨櫃，塞住啲人蛇偷渡去歐洲，係咁意又焗死五十幾六十人，搞到行出去，個個人都老老土土，試問又點樣對呢個自稱代表「中國人民」嘅政黨有歸屬感？
唔好問點解咁多人唔愛你，問吓自己做過啲乜嘢足以令人愛自己。即是話，照吓塊鏡，睇吓自己個樣，整容？冇用，最緊要係相由心生。個心好邪，一日到黑，沉迷權力慾，淨係諗住點樣霸住權力，唔畀人分享，人哋有不同嘅意見聲音，就大事咆哮，話係賣國、漢奸、港獨，呢亭嘴臉，呢種心地，又邊有人去愛？
講得個愛字多，都覺得肉麻，不如講吓實際。煲呔曾上京考牌，原來合格，咁都係好消息。同樣係打條呔，香港人「寧要煲呔曾，不要魔呔曾」，見過曾憲梓嗰個黑面判官嘅樣，都食唔落飯。
曾蔭權民望高，政府公務員睇佢頭。上到北京，橫遭中方芝麻官矮化，都好易明解。冇嘢，你年薪四五百萬，有得打高爾夫、飲紅酒，佢喺北京踎一世，都只係得一二千，係人都難免心理唔平衡。你上嚟見佢，佢梗要係咁意噴你一面屁先至過癮。煲呔若然經歷過胯下之辱，正係大丈夫嘅磨練㖭。
土共排斥曾蔭權，尤其行政會議之內，有人當佢係頭號假想敵，話佢係港英餘孽。不過香港人寧要餘孽港英，都唔想親中振英。今次親中報章話曾蔭權得到中央加分，返落嚟就有好多人會眼紅佢，八方想向老董呼籲，唔好再排斥煲呔，人哋民望高過你，你永世冇得恨，應該更好地配合曾蔭權施政，咪再夥同啲土共搞屎搞棍。若然曾蔭權提早取代廢董，咁二○○七年普選特首，都未必會有咁多人堅持。特區問題，若然會有「良性孖曾」──曾慶紅搭曾蔭權，剋住嗰另一個「惡性孖曾」（係邊兩個姓曾嘅，套句大陸話，大家市民心中有數），廢董保外就醫，風光大退，加埋繼續「屍爬」自由行，香港都未必衰到貼地嘅。
傳真︰2623-9278
電郵︰