頻見單位易手賺錢嘅薄扶林貝沙灣，原來外籍客都唔少。有個法籍業主，重摸出單位，賺二百幾萬，接手係美國華僑。
美聯徐志強話，貝沙灣二期（南岸）三座高層B室，一五○二方呎，成交價九百四十五萬，每呎近六千三。
業主係法國人，舊年9月以七百四十一萬，買入作長線投資，見到近期豪宅價格大升，回報率可觀，即時決定出售，單位五個月漲價近三成。
美聯話，貝沙灣外籍買家佔兩成以上，而且嚟自唔同國家，有美國、英國、德國、澳洲、法國等等。內地買家都佔上重要部份。入伙時，屋苑實行變成國際村。
恒隆噚日派成績。行內最關心，無乜土儲嘅恒隆，會唔會勾地投地。
恒隆主席陳啟宗向蘭西報料話，好彩當年無高價入市，公司先至有今日。佢重講咗個鮮為人知嘅故事……
當年有個基金經理指住佢話佢懶，陳主席回應：「你畀錢請我（做主席），唔係只想我買嘢，係想我喺適當時間，做適當嘅嘢。」事後證明，恒隆無高價買地，策略正確。
多年後，陳啟宗再次遇到嗰位基金經理，就指番住佢話：「聽你講就×街嘞！」陳生果然好記性兼好勞氣。
樓價反彈，住宅及商廈湧現轉手賺錢個案，𠵱家連工廈都多咗。
舊年頭三季，每月只得八宗工廈轉手獲利。今年1月，升到二十九宗，2月上旬有十三宗。中原估計，呢類紀錄會一路路多，首季會創新高。
睇番1月個案，唔少係舊年7月買入，𠵱家獲利回吐。
不過，賺得最多嘅一宗，就揸咗一年至賣，係觀塘嘉士亞洲工業大廈四樓，以二百七十五萬轉售，獲利一百一十五萬，幅度達七成二，一啲都唔比住宅或寫字樓遜色。
想生意好，好員工最緊要，中記一向重視培訓主管級人馬。九龍區董事一姐劉瑛琳，噚日大談點樣建立成功團隊。佢話，有「為」有「不為」，又列出將帥十二項缺點，以作警惕。
一姐話，代理最容易犯嘅缺點，係勞而無功，即係做嘢無計劃，最後乜嘢都做唔到，另外係做事誠意不足。其他好似孤陋寡聞、優柔寡斷以至後悔，都係主管級人馬嘅大忌。
建立成功團隊要有所「為」，就要定立共同明確目標，選用適合人才，同埋發揮最佳表現。
蘭西
電郵地址：