許志安呢幾日都高調講佢嘅單身宣言，意味佢同鄭秀文（Sammi）嘅感情已經「無可挽回」，馮仁昭聽聞呢次安仔咁主動講感情事，係另有內情。
事緣安仔同Sammi已經好耐冇見面，有傳安仔近排同一個二十幾歲嘅富家女交往緊。有日安仔同富家女去街遇到記者，可能佢擔心俾人大做文章話佢花心，所以佢即刻自爆單身。
噚日安仔喺台灣宣傳時，記者問佢點解唔同Sammi繼續愛情長跑？佢竟然話：「我係長跑好手，不過腳抽筋，再跑落去，對腳就會斷。」有傳是第三者介入引致分手，安仔只係話當兩個人無言以對，就知道緣已盡。
安仔話要維持愛情長跑，秘訣係明知自己大男人，都要特登扮小男人，問佢喺Sammi面前係大男人定小男人？安仔即刻話自己係真正嘅男人。
而噚日Sammi嘅經理人郭啟華喺電話度話：「我今日同Sammi傾電話，聽佢把聲都好開心，係覺得咁多報道好煩囉，其實佢不嬲鍾意留喺屋企，咁都算係抑鬱我冇乜好講！」
韓國變性人河利秀噚日喺兩位助手陪同下嚟香港，入住金鐘萬豪酒店，河利秀攞住一個Gucci手袋仔，雖然佢戴住墨鏡，但一見到香港傳媒即刻鬼咁親切，擺晒甫士畀記者影相，馮仁昭都覺得佢嘅S身形弗到漏，前日佢喺台灣重着露臍裝大騷小蠻腰，真係睇到fans流晒鼻血！
黎明所屬嘅新力唱片公司舊年三月，發現上海錢櫃卡拉OK將佢嘅三首歌《全日愛》、《酸》同《盡情的愛》嘅MV，以卡拉OK形式播放，有侵犯版權之嫌，於是新力唱片入稟上海法院，向對方索取三十萬元人民幣（約二十八萬港元）賠償，同五萬元人民幣（約四萬七千港元）訴訟費。
趙文卓早排嚟香港參加舊愛梅艷芳嘅喪禮，送別阿梅之後，趙文卓𠵱家喺成都嘅西岒雪山拍緊劇集《風雲II》，之前佢一直唔肯多提感情事，但今次佢竟然帶埋做京劇演員嘅新女友張丹露，一齊喺雪山過情人節，佢兩個重去成都嘅高唐寺祈福，睇嚟趙文卓同女友嘅感情都幾穩定。
無綫裁員風波暫告一段落，無綫職員協會不斷替員工爭取權益，噚日方逸華出席將軍澳一個宣傳活動時，對於無綫裁員只笑笑口話：「好小事啫。」而無綫董事及集團總經理何定鈞就話：「嚟緊嘅二十三號會安排員工同行政人員對話，我哋亦唔會秋後算帳，因為呢啲係公會嘅權利。」
李安嘅爸爸李昇日前去世，住喺紐約嘅李安同喺台北嘅細佬李崗，都想接阿媽返屋企住，李崗個老婆話最後決定安排李媽媽留喺台北。李爸爸曾任台南第一中學校長，所以喪事由學校全權處理，現定於下周日（二十二日）喺台南舉行家祭同公祭。而李安𠵱家嘅心情已經平復好多。
