各大學籌款，各出奇謀，自去年特區政府提出「籌額配對」（matchingfund）（大學籌一蚊，政府畀一蚊，上限係五億元）之後，大學拚命籌款，第一輪以中大、港大領先，當然唔出奇。
最近推出第二輪籌款，大學已露疲態，鬼咩，去年谷咗一輪，能夠動之以情，打得心口嘅，已經捐咗錢啦，今年重捐？地產富商都怕要唞吓氣啩？
哈，地產發展商賣豪宅，買家好多係在中國內地密密搵錢冇人報道嘅廠家，大學搵廠家捐錢，亦似開金礦。聽講理工大學食正條水，已經收到捐款二億元，最大一筆當然係李兆基嘅四千五百萬，但最近向校友埋手，林大輝就捐咗一千萬，其他廠家接手亦好爽手。以前港大畢業生做高官、醫生、律師、工程師；中大畢業生入商界；工專、理工學院（前理大）嘅學生就入廠捱世界，到咗二○○四年，港大中大校友好睇唔好食，有名而無大利；反之，昔日工專（TechnicalCollege）學生做廠，唔少發晒達，潘宗光去搵佢哋捐錢，冇乜托手踭。
譬如理大搵成龍博士做「一日教授」（onedayprofessor），搞一晚飯局，飯局上拍賣成龍着過嘅戲服，飯局每席好似賣八萬元；加加埋埋，借成龍博士個名一用，一晚就多得各位廠家支持，籌咗二三百萬。以目前情況嚟睇，理工籌款後勁凌厲，追過中大港大，一啲都唔奇。