舊年幾千市民迫爆太空館，爭住睇六萬年嚟火星最接近地球一刻。今年天文現象一樣多，24日凌晨時分就會出現「雙影凌木」，雖然「雙影凌木」唔算罕見，但當晚可以同時睇埋「金星合月」，一晚睇晒2個天文現象，確係機會難逢。
記者：陳震霖
攝影：林栢鈞
模特兒：Loraine、Mo（SunSpot）
鳴謝：星河科研社（
所謂「金星合月」，即係運行速度比金星快嘅月亮，喺2月23日晚上7時至9時，會最接近金星。夜空中，金星係最光星體，就算空氣污染幾咁嚴重，理論上向西望都一定睇到，到時金星會出現喺月亮右面，太陽光經地球反射，射落原先直接射唔到嘅月亮黑暗面，夜空會出現暗黃色嘅娥眉月。
至於「雙影凌木」，即係木星其中2粒比較光嘅衞星影子，喺2月23日晚上11時至24日凌晨4時，會投影喺木星表面，下次出現日期為3月2日。到目前為止，已發現嘅木星衞星有60幾粒，其中4粒由意大利天文學家伽俐略發現，叫「伽俐略衞星」，當晚木星表面出現嘅投影，屬於「伽俐略衞星」中的「愛歐」（Io）及「卡利斯托」（Callisto）。
是次免費觀星活動，由大埔滘互動自然中心舉辦，中心內嘅香港唯一私營天文觀測室，有25年歷史，由中文大學96年贈予科研社主席方先生。室內嘅天文望遠鏡口徑30mm、長度2500mm、2噸重，屬牛頓式反射望遠鏡，鏡片美國製造，當年中大買入，學生自行配上零件。
當晚除欣賞「金星合月」同「雙影凌木」外，大家重可以近距離睇清楚土星、木星表面狀況及一系冬季星座如獵戶座、金牛座、大犬座等等。
睇星星前，不妨去香港最早設立嘅大埔滘自然護理區走番轉。護理區面積450公頃，先行自然教育徑，徑內有10幾個傳意牌，教你認識樟樹、白千層、假蘋婆等過百種樹木，45分鐘行得完，輕鬆易走；再行大埔滘野外研習園，園內一樣有傳意牌，介紹9種蝴蝶生長周期，當中的印度馬兜玲係鳳蝶嘅寄生植物，喺未來4月至7月期間，重有機會一睹鳳蝶由蟲成蛹嘅生命歷程。
中心內有小白鷺餐廳，南歐建築風格，背靠山嶺，面向吐露港，正宗背山面海，對出有個瀉湖，可邊醫肚邊欣賞可愛小白鷺，午餐$60，有齊餐湯餐飲，靚景送飯抵到爛。
1﹒坐井會
活動：觀星營（冬夜星空觀金木水火土5星）
日期：2月21至22日（2:45pm集合）
地點：大嶼山石壁紅十字會營
費用：會員$130，非會員$160（包宿費、早晚餐、營費及觀星資料，交通費自付）
查詢：92205647
2﹒香港天文學會
活動：路邊天文
日期：2月28日（7:00pm至10:00pm）
地點：大埔海濱公園
費用：全免
查詢：26541406
3﹒香港觀天會
活動：金星水星大距觀測暨月蝕預習（觀水金2星「東大距」天文現象，教如何觀測月蝕）
日期：3月27日（5:00pm集合）
地點：元朗八鄉長埔村香港觀天會天文觀測站
費用：會員免費，非會員$20
查詢：75813544
想睇星星？嗱嗱臨填妥並剪下參加表格，傳真至星河科研社，就有機會免費睇「金星合月」同「雙影凌木」，名額有限，報名要快！
地點：大埔紅樹路2號大埔滘互動自然中心天文觀測室
活動日期：2月23日至24日
觀星時間：7:00pm至9:00pm觀「金星合月」、土星光環、木星、星座；11:00pm至1:00am觀「雙影凌木」
名額：30名（費用全免）
報名日期：2月20日
報名時間：9:00am至5:00pm（先到先得）
報名方法：傳真至星河科研社（81060660）
交通：大埔墟火車站乘的士（約$20）直達大埔滘互動自然中心，車程5分鐘。