張學友和劉德華在音樂頒獎禮上，曾一度爭崩頭，今日二人再在影壇頒獎禮碰頭，分別以《金雞2》和《大隻佬》角逐金像獎「最佳男主角」獎。昨日在寰亞有份投資的電影《江湖》記者會上，學友十分風騷，並自爆渴望當影帝，故才被曾志偉說服參演。
曾合作拍攝電影《旺角卡門》和《阿飛正傳》的劉德華和張學友，多年後再結片緣，昨日聯同曾志偉、余文樂和陳冠希等人，一同出席在銅鑼灣舉行的電影《江湖》記者會。記招開始前，一眾演員在酒店拍攝電影海報，華仔和學友十分入戲，兩人在拍照時更擺出不和的表情。
以駁髮造型出現的學友，比有份投資該片的華仔更風騷，他經常與余文樂、曾志偉等人有說有笑。而在記者會上，更多次流露出期望自己能憑電影得獎的心情。
學友透露：「志偉搵我拍呢套戲嗰陣，話過呢套戲可以攞獎，我唔同華仔呀，聽到梗拍啦！真係好希望可以憑呢套戲得獎，但可能又係華仔攞。」在旁的志偉即說笑回應：「佢（學友）喺戲入面做殘疾人士，呢啲內心戲唔容易做。話係攞獎啫，又唔係話喺公眾攞，遲啲整個盃畀佢囉！」
事後學友接受訪問被問到是否渴望攞獎，他說：「都幾想呀，你見我啲野心啦！自從開始拍番戲，我就好想，但攞唔攞到都要睇個天，盡力就係睇自己。」至於華仔以片酬投資在該片上，在記招上又不斷被取笑讓出「最佳男主角」獎項，他說：「咁就開心喇！如果真係個個都覺得我能夠讓獎，佢哋攞到獎要多謝我喎！」
此外，陳冠希在出席記招時顯得心事重重，經常木無表情，更站在一旁抽煙。問到他知否前緋聞女友鍾欣桐與方力申傳緋聞，陳冠希即黑面說：「關我乜嘢事呀？」
採訪：王連連
攝影：陳慧安
