喺新一屆瑞士日內瓦車展舉行前夕，德國奧迪（Audi）車廠率先為車迷展示旗下最新嘅A6車系；新車不但擁有全新造型，同埋車廂設備配搭外，較前更出色嘅性能表現亦教人一試難忘。有興趣嘅車迷，不妨留意吓今日嘅介紹噃！
新一代奧迪A6車系，圓潤而流暢嘅車身線條，響略帶有同廠A8車系影子嘅車首造型襯托下，除帶有酷似Coupe跑車嘅活力感外，又顯現出豪華轎車應有嘅豪邁氣派。
打開車門所見，新車車廂鋪排驟眼望去與現有A8車系相近，同樣予人豪邁氣派之感；不但因軸距較前增多83mm（達2843mm），而令車廂空間變得更寬敞闊落，加上前後兩排承托力甚豐嘅真皮座椅，乘坐可謂妥貼又舒適。設備配搭亦見齊全，除原廠恒溫冷氣、高級音響組合外，而車內重會有MMI多媒體控制介面連顯示屏幕㖭！
響推出新一代A6豪華房車嘅同時，廠方又為新車增設有多台引擎供用家選擇，當中包括2.4公升V6型號（馬力177匹，扭力23.5kgm）、3.2V6FSI型號（馬力255匹，扭力33.7kgm），以及4.2公升V8型號（馬力335匹，扭力42.9kgm），以迎合不同用家嘅需要。
另外，新車一套出色懸掛組合，匹配多套先進電子裝備，不但令行車循迹性來得更強之餘，廠方更會於2005年，為新A6加設一套全新Adaptiveairsuspension氣壓懸掛系統，從而可讓乘客有更舒適嘅乘車環境外，又可以有更佳操控表現。
