煲呔曾上京前後，都好勤力咁見人傾政改問題，但係噚日朝早突然甩底，工總梁君彥同一大班老友等極唔見佢，最後只係見到政制發展專責小組嘅梁愛詩同林瑞麟，究竟所為何事？
煲呔得力新聞秘書Cathy話，煲呔屋企突然有私事要辦，所以見唔到梁君彥，不過佢叫大家放心，煲呔唔係身體有事，下午都已經返工。
講到政改，阿松以前個新聞秘書譚志源，調任政制事務局首席助理秘書長之後，經常都要去公開場合，記低所有關於政改嘅言論，噚晚佢終於「處男下海」，第一次去研討會代表政府上台講政改。
雖然譚生冇遇上詞鋒尖銳嘅民主派，一左一右只係鄔維庸同邵善波，但係佢老兄挑起推廣《基本法》嘅事嚟講，結果俾鄔維庸噴到一臉屁，真係唔好彩。
傳真︰2623-9278
電郵︰