幾位朋友嘅朋友因為患上胸、肺、前列腺病，須排期入公立醫院做手術，其中一位等到好心急，猛咁託人去問，當然不得要領啦，咁多人排緊隊，個個都鍾意入公立醫院，邊有得快呀，你估入養和、港安咩。
飲春茗碰到一位資深醫護界人士，同佢講起排隊入院情況，佢話公立醫院做到失魂，根本無法應付，尤其是威爾斯醫院係新界嘅唯一大型醫院，病人特多，醫管局調配又亂，譬如最近威院收到太多流感病人，逼爆內科，內科醫生忙到得閒死唔得閒病，流感病人住滿病房，外科手術惟有延遲，所以外科醫生居然想做都冇得做。
左丁山問：「唔係可以調啲流感病人去大埔那打素醫院嘅咩？」資深人士瞪大眼話：「那打素有十九間豪華病房，好靚㖭，但漏水呀，唔收得病人喎，你話病人重要吖，還是漏水重要？質晒病人畀威爾斯，威爾斯啲大學教授非常勞氣，但不怕官，最怕管，醫管局啲官仔可以話事，大教授都當你死嘅啦。」好似好激氣噃，左丁山問佢：「點解唔搵威院總監馮康去溝通、調動呢？」
不提馮康猶可，提起馮康，資深人士面都紅晒，低聲怒吼一聲：「我哋想××兩鎚！」講完立即知道失言，連忙走開唔再講。資深人士平時涵養甚佳，為己為人，估唔到講起醫院就刺激到面紅耳熱，睇怕醫管局醫院之間，暗湧矛盾甚大。