常盤貴子近日博晒命宣傳佢主演嘅《赤月》，連佢自己都話套戲係佢生命中最重要嘅作品。前日佢上電台接受訪問，亦唔介意攞佢同伊勢谷友介嘅性愛戲嚟做話題。
佢話場性愛戲係講佢為咗要伊勢谷戒鴉片而互毆一輪，點知打打吓就發生火辣關係，場戲足足拍咗四日，佢話：「我哋兩個都瘀晒，唔係演技嚟㗎，我哋真係嬲到互毆！中途重去咗睇醫生幾次。」
連常盤出嘅散文集《nolove,nolife》入面，都講咗好多關於《赤月》嘅嘢，佢話自己啱啱喺中國拍緊套戲期間張國榮去世，佢當時好痛苦，佢話：「我一諗起佢就會崩潰，所以一唔使埋位，我就聽最嘈嘅歌，等個腦冇機會停落嚟。」
自言拍過好多次拖嘅常盤，喺本書入面亦話試過唔少次因為男友一腳踏兩船而怒斬情絲：「佢哋唔知女人嘅直覺好敏銳㗎咩？最搞笑嘅係有一次我喺男友屋企發現一條長頭髮，我話：『呢個重唔係證據？』而對方竟然答：『係以前住嘅人留低㗎！』」之後就當然係立即分手啦。
至於佢喺處女作《惡魔之Kiss》曾露點，常盤話當時覺得藝能界好現實，你唔做大把人做，冇話後唔後悔，不過時間過咗一輪之後佢可能唔會，所以常盤話：「當時我心諗有糧出就得啦，社長亦叫我放三年時間出嚟，失敗再回頭做OL都唔遲啦。」