近排多股仔炒作之餘,市場亦特別多傳聞,有啲一聽就知係吹水,一啲聽落就半真半假,唔知係堅定流?
好似鳳凰衛視(8002)咁,踏入04年當堂生晒,股價升幅累積巨大。鳳凰衛視靜咗唔夠兩日,噚日又升4.26%,收1.47元,創下52周新高,成交股數1308萬股,金額1848萬元。經紀陳話,坊間傳聞鳳凰衛視老闆想收購合併亞洲電視。
鳳凰衛視呢排炒得咁勁,小初又點會冇留意,不過一直以為炒作理由係廣告收入大增之類,雖然鳳凰衛視老闆同亞洲電視有多少淵源,早前江湖亦有所傳聞,但可信性唔係咁大,今次又用呢個理由翻炒,小初實在覺得有啲牽強。
另外,舊年上市時係威係勢的時裝股寶姿(589),近排唔覺唔覺又見股價抽上,噚日升5.3%,收15.80元,原來又創上市新高。經紀黃話,隻股上市之後冇耐雖轉平淡,但一直為芬佬留意,近期又有基金增持,所以股價咁靚仔。
慕容小初