隔晚美國冇市，港股自己浮動，高低波幅174點唔細，埋單只係唔見16點，好友淡友算係和氣收場。
恒指已抵上月高位，反覆難免，要大跌唔易，暫時要大升亦難，若見大市忽然有少少似樣跌幅，可以諗吓博反彈，博執恒指一二百點。炒大市波幅，做法係喺低位買恒指Call輪，大把你揀，9282同9422係最佳對象，9282喺5月到期，輪價33仙，溢價1.5%，槓桿率13.5倍。9422喺6月夠鐘，輪價49.5仙，溢價2.5%，槓桿率11.9倍。
國企指數再升10點，收報5097，距離上月高位有343點，暫時同恒指一樣，都係上吓落吓，將來仍有機會再試上月高位，可以吼低位收集中企指數Call輪，對象係9363同9317，前者6月到期，輪價50仙，溢價1%，槓桿率4.4倍，後者5月夠鐘，輪價71仙，溢價1.3%，槓桿率3.8倍。中企指數Call輪，爆炸力同殺傷力冇恒指輪咁勁。
下一浪，長和系有機會跑出，低位收集相關Call輪。長實Call輪揀9160，5月到期，輪價56仙，溢價5.2%，槓桿率13.2倍。和黃Call輪要9066，數據靚絕，4月到期，輪價62仙，溢價1.1%，槓桿率10.6倍。
章 盛