噚日警隊正式向全港警務人員免費派「套」，呢種套「硬掘掘」，不過各位唔好心邪，警隊派嘅其實只係新嘅證件套，適用保護委任證件，而唔係有啲乜嘢特別用途。
查實九七同九八年警隊兩次換新委任證件都送膠套，不過當時嘅透明度差同質料好易壞，又同證件容易黐埋一齊難掹出嚟，好多警員都寧願自掏腰包買個皮套裝證件。
噚日部份環頭警區開始陸續派發一款經改良嘅透明硬身膠套，畀警員放委任證，膠套背面重有一個小圓洞，方便將證件退出，真係好鬼細心啫。
警方支援科策劃行動警司王碧珊同八方講，各同袍可自行取決獲分發嘅膠套或其他自購證件套，但係證件套嘅面部要透明，畀人清楚睇到證件上嘅相片同身份資料咁話。
（圖）證件保護套背面有小圓洞，方便將證件退出。
傳真︰2623-9278
電郵︰