香港素有美食天堂美譽，世界各地唔同食肆雲集香江，連喺內地有六百多間連鎖店嘅蒙古羊肉火鍋店「小肥羊」，都嚟香港開設旗鑑店，租用港島傳統零售旺區，銅鑼灣廣場二期商舖樓面，進軍香港。
中原包國堯透露，「小肥羊」租用二樓全層，萬三呎，會做香港旗鑑店，月租三十萬，每呎二十三蚊。
據了解，大業主麗新集團，對「小肥羊」嘅背景同前景，抱樂觀態度，特別撥出一塊高六米，闊十一米嘅特大廣告板，幫「小肥羊」招徠顧客。
「小肥羊」火鍋集團，建基於內蒙古包頭市，99年8月才開設第一家店舖，短短幾年迅速發展，現已成為有六百六十間特許經營連鎖店嘅飲食集團。去年更進攻美國市場，今年嚟港開店舖，聽講會四圍搵舖，重考慮嚟香港上市。
中環德輔道中廖創興銀行舊址，重建得如火如荼。
地盤圍欄掛上告示牌（圖二），通知新址喺附近新世界大廈，重好清楚畫晒地圖，有晒箭嘴指示。
一個搬遷啟示應該有嘅嘢，都差唔多齊晒。
不過，橫睇掂睇，都好似差咁啲嘢。原來就係唔見咗「廖」「創」「興」「銀」「行」呢五個大字，淨係寫住「總行舊址」同「總行新址」。
成日喺中區出入嘅，當然知道，告示牌所講嘅舊址，係歷史悠久嘅廖創興銀行啦，但係間唔中先至去一次中環嘅，可能就一頭霧水。
煮餸煮到世界出名嘅甄文達，日前嚟香港，幫信和尖沙嘴中港城商場，舉辦《中港城「甄」愛Mall幻廚房》活動任嘉賓。佢重即席施展渾身解數，表演烹飪功夫。
點解信和會搵甄文達？原來中港城商場翻新後，喺二樓增設美食廣場「金牌坊」，共有八家著名食府承租，所以就搞呢個活動，順便等甄大廚同現場觀眾，一齊品嘗各家食肆嘅美食。
好收成集團老細楊紹棠，見近排豪宅市旺，又再高調放售96年以五千二萬買入地皮興建嘅渣甸山大屋。
獨家代理中原分區經理雷銳光話，呢間屋又大又新，最特別係地細屋大，佔地只有八千零呎，間屋就足足萬二呎，連埋四千幾呎大花園同泳池，區內都算巨無霸。間屋99年落成，比起附近至少三四十年嘅古老大宅，外觀都省鏡啲。
業主叫價億五，計落呎價只係一萬二千五百蚊。聽講𠵱家有好幾個客出價好貼，如果成到嘅話，業主賺唔少。
寫字樓造價，經過舊年大幅下滑，今年掉頭向上，摸貨、創新高個案，更頻頻出現，而且有由港島區蔓延到九龍尖沙嘴區嘅迹象。
美聯鄺寶謙話，康宏廣場噚日出現單摸貨個案。至於新文華中心，呎價就創新高。
康宏廣場九樓千二方呎單位，月初以四百三十八萬易主，啱啱再以四百九十二萬摸出，短短兩個禮拜，賺咗五十四萬。
另外，新文華中心五樓，三八○方呎單位，賣出價一百五十二萬，每呎近四千，創出該廈99年以嚟新高。
蘭西
電郵地址：
