中華旅行社總經理張良任噚晚喺灣仔君悅擺春茗，搵咗候任貿發局總裁林天福做主禮嘉賓，林生好識做生意，話如果今年地方有限，下年可以考慮去會展。唔經唔覺，張良任已經駐港三年，佢老兄人面甚廣，政界、商界同文化界人士都畀足面，馬丁、楊森、馮檢基、蔡素玉、周梁同黃宏發都出現。大家三句不離愛國論，發叔話，「國係公、黨係私，點可混為一談」，馬丁即加入討論，重發表愛國愛妻論，兩人一唱一和笑住話，唔通愛妻等於愛國，愛國等於愛妻云云。
呢次春茗獎品多多，足金金猴有五隻，張良任同台灣行政院陸委會蔡英文一人捐一隻，李國寶就捐現金一千大元，最騎呢係羅康瑞，捐出上海新天地會所中式套餐一席，要人搭飛機去攞獎，真重皮。賭王何鴻燊就醒好多，捐出葡京一晚住宿及澳門來回船票。
（圖）講起愛國，馬丁都會諗起愛妻，真係濃情蜜意。
傳真︰2623-9278
電郵︰