唐唐下個月要讀出佢上任以來第一份財政預算案，銷售稅睇怕走唔甩，一定會放入議程之內，唐唐亦冇乜好計，開源節流得幾道板斧，保守估計，每年可帶嚟一百八十億，唔算小數目。
八方聽聞，有關嘅研究重擔落咗前廉署首長、𠵱家係馬時亨常秘嘅黎年身上，由佢負責度掂佢，包括要保證弱勢社群嘅日常生活所需柴米油鹽不受影響，而同時可以令啲有錢高消費嘅人付多啲稅款，扭轉𠵱家靠晒一部份人（特別係中產）納薪俸稅嘅唔公平嘅現象。
唐唐預咗好多人會反對，包括佢嘅舊黨友周梁，但係呢個世界冇可能令人人都高興，況且好多先進國家都一樣有銷售稅啦。
八方一向認為開徵新稅必定要好有勇氣，因為香港實行簡單稅制，所以黎年一定要將個收稅嘅方法包裝得好好睇睇簡易明白，唐唐想做特首，最好由自己開刀，宣布徵收巨額紅酒銷售稅。不過，呢個政府乜都慢，呢單嘢睇嚟要搞幾年先實行到，到時分分鐘連特首梁振英都已經下台嘞。
傳真︰2623-9278
電郵︰