繼新世界發展（017）宣布供股後，市場再傳出更震撼的抽水傳聞，就係中電信（728）大股東會減持10%股權，套現資金可能高達200億元，消息令港股一度跌近13700水平。不過，市場並非不理性，投資者一早預咗中電信母公司會減持，或中電信配股集資，問題是規模有幾大而已，如果集資金額是200至250億元水平，只不過是港股一日成交多些少，市場有足夠能力承受，恒指跌幅最終收窄至16點，收報13815。
傳聞中的主角中電信則挫4%至2.975元，據講中電信會在3月中公布業績，如果係真嘅話，之前1個月不可能有任何配股行動，但中電信沽空金額開始增加，好似已經有人做緊嘢。
財經事務及庫務局局長馬時亨亦透露，社保基金將投資港股，國企指數前日上升近3%後，噚日反覆靠穩，收報5097點，升0.21%。市場經常以為社保基金流入香港，H股就一定受惠，其實社保基金若要投資國企，國內大把A股可供選擇，點解嚟到香港重要買H股，而唔買滙豐（005）同渣打（2888）呢類國際性股份呢？
鷹美（2368）話正洽商配股或發行可換股債券，交易可能會導致股權易手，股價大升18.5%，收2.30元。鷹美主要做運動服裝，市場現正揣測買家可能是裕元（551）或旗下的新灃集團（1223）。鷹美同裕元有個共通點，就是同樣要招呼NIKE呢個大客仔。
生命科技（1180）認股證將於下周五掛牌，未來一周正股應有異動，但噚日則跌0.6%，收0.178元。
阿 虎