掀起一場「愛國口水大風暴」，今次真係捉正蟲。中國商務部副部長安民，喺北京同唐唐一齊見記者，都要焗住解畫乜嘢叫「愛國」。安民本來係專責經貿，以愛錢、𢱑錢為優先，家陣就迫佢要講愛國，唔怪得佢戴住副黑眼鏡，揦口揦面，個樣好唔耐煩。
不過，安民講話，有一項重大突破喎！點解咁講呢？原來佢話，共產黨係中國嘅代表，亦即是香港嘅代表，香港人可以唔愛呢個黨，不過，若然想「破壞中國穩定，就是休想」！
吓，可以唔愛共產黨呀？咁安民就真係好「開明」夾「寬鬆」喎。一早就咁講喇，愛國唔係愛邊個政黨，好似國父孫中山咁，佢就唔愛大清國嘅慈禧后黨嘞。毛澤東鄧小平，夠唔愛國民黨咯。
共產黨若然本身好可愛，唔使賣廣告，都有億萬人民爭住愛佢，而唔只係一小撮有私心利益嘅香港商人及土共去咀佢啜佢同Lai佢，安民終於承認「唔愛黨唔等於叛國」，雖然係等同於承認阿媽係女人，不過作為一個共產黨員，雖然好似安民咁戴咗副有色眼鏡，終於睇得到阿媽係女人嘞，真係好令人感動……
至於「破壞中國穩定」，咁就好笑喎。香港人只係要求○七普選，○八年立法會全面直選，點會破壞香港穩定？有啲土共代表胡溫話：畀你香港普選，咁廣州、上海、北京啲人咪一樣可以要求普選？咁重唔危害國家穩定？
呢個問題就要分開兩層嚟講：第一，共產黨自稱係全國人民嘅利益代表，佢又自稱全國安定，咁就算上海廣州人要普選，一定會全民選共產黨繼續執政，唔通使驚會選咗共和黨上台？
第二，香港就算○七普選，大陸一向都有新聞封鎖，好似香港年年集會哀悼六四，中央台照例唔播，十三億人民根本唔知。既然中國可以封鎖新聞，全國人民都唔知外面乜世界，又點會影響大陸穩定？至多六百萬市民同中方協議，以後自由行大陸遊客落嚟，問到你哋香港人有冇普選，人人合作，一概封口話冇，甚至話現時香港嘅領導人都重係英女皇委派嘅港督，齊齊瞞住啲大陸同胞，幫國家封鎖消息五十年，咁中國政府咪唔會驚危害佢嘅穩定咯！
傳真︰2623-9278
電郵︰