旺角地鐵站巧遇「鬍鬚弟」，佢係最新崛起嘅潮界經紀，負責聯繫唔同嘅潮流單位，夾埋一齊「搞啲嘢」，就可輕易搶到時下班神經兒童褲袋裏啲錢。相比其他經紀，佢較識得如何包裝自己，從來唔會以生意人形象示人，只會以「創作人」自居，雖然佢並冇創作過任何作品。今次佢專程嚟旺角，原來想買部時下最流行嘅數碼相機，佢話：「我今次專程嚟買嗰部好薄、好細部，螢幕又夠晒大，而且重係用蔡司鏡頭兼且有500萬像素嘅相機，之唔係就係嗰部SONYT1囉！」講起呢部T1，近期都算賣到開巷，好多潮人都擁有一部，相機舖班哥仔話，近排每日起碼賣十幾部T1，水貨價每部$3,500，所以你話香港人幾有錢至得！「鬍鬚弟」繼續話：「我同美國Nike個總裁阿Mark都有偈傾，佢都係用緊T1，咪又係我介紹畀佢知SONY有部咁正嘅機！」唔講都唔知佢咁巴閉！最後「鬍鬚弟」細細聲同我講：「話時話，你有冇識邊間水貨舖買T1最平？重要碌卡唔收Charge嘅！」講到底，佢都係典型香港人，實在可愛。
主持人：大食Jack 八卦熱報：