次次有台灣活動，光華新聞文化中心主任路平一定引人注目，噚日係中華旅行社嘅春茗酒會，着住條黑色開胸裙，挽住個紅色手袋嘅路主任同身披皮裘嘅前主任江素惠可以話係爭妍鬥麗。
路主任用廣東話同記者講，過年返咗台灣幾日，所以要多啲練習補番，又話嚟咗香港一年，新聞百分百聽到，三集《無間道》佢都有睇，因為夠地道。其實路主任就快去港大開課教通識教育，所以唔驚冇機會學廣東話啦。
八方問佢對近期嘅愛國爭論點睇？佢阿姐一聽到個「愛」字，就即時溶化咗，好嬌嗲咁話：「愛係好麻煩嘅，我會咁答你。」講完，就輕輕地同八方拜拜，冇嘢補充。八方只有一句「吓？」冇嘢補充。
（圖）蹺住兩位「俊男」嘅路主任（中），對「愛」字好似好有體會，講到「愛國」都充滿浪漫色彩。 林妙萍攝
傳真︰2623-9278
電郵︰