羅嘉良、張衞健、許志安同吳鎮宇四個男人，即將合作主演電視劇《伙頭智多星》，呢套劇嘅內容，係圍繞羅嘉良同兩個細佬張衞健以及吳鎮宇，佢哋都擅長整嘢食，劇中重會介紹各地美食，又會去內地同日本取景，暫時估計製作費都要幾千萬。
套劇預計會喺下個月開拍，男角雖然定咗，但女角就重未有人選，製作公司呢排都開始公開招募新面孔。但馮仁昭收到料話身為男主角嘅羅嘉良同張衞健都好緊張女主角人選，張衞健就力薦女友張茜，佢兩個感情穩定，一於拍拖開工，寓工作於娛樂。
而羅嘉良就推介緋聞女友宣萱，皆因佢哋兩個合作得多自然有默契。馮仁昭重聽到製作人都好欣賞朱茵同台灣女子組合S.H.E，不過最終女主角人選花落誰家，都要睇埋公開招募，因為唔排除最後會搵個有潛質新人上陣。不過計我馮仁昭話，搵萱宣好似有噱頭啲喎，話晒前任男友同緋聞男友同場，加場兄弟爭女戲就最啱啦！
曾跟張國榮在電影《夜半歌聲》中合作過嘅內地演員黃磊，前晚到咗台灣宣傳，佢自爆下月會同拍拖九年嘅女朋友孫莉結婚，佢用國語講：「去年已想跟女友結婚，但卻遇上『沙士』，雖然現在有禽流感，但我們決定不再延期。」黃磊表示好欣賞女朋友賢淑同細心。
噚日有報道話張燊悅識咗個富家子Desmond而同雷頌德分手，又話女方成日去曉峰閣探Desmond，但馮仁昭知道曉峰閣其實係張燊悅嘅新居。對於分手傳言，張燊悅噚日就話同雷頌德一向都係好朋友，而Desmond𠵱家亦只係佢嘅朋友之一，不過有人喺幾日前至見到張燊悅同雷頌德一齊，所以分手傳聞都可能係捕風捉影啫。
台灣第一花花公子黃任中日前病逝，有報道指黃任中生前俾台灣政府追稅，為免被查封財產，黃任中就喺山區收埋咗大批寶藏，有指佢契女謝千惠（小潘潘，）負責保管珠寶保險箱，小潘潘噚日用國語講：「如果真是這樣，我也不用自己買珠寶。」事後小潘潘重講笑話要趕住去挖寶藏。
台灣名導演李安嘅爸爸李昇日前逝世，佢即時返台奔喪，佢同胞弟李崗噚日喺台灣召開記者會，表示喪禮將按爸爸生前指示，一切從簡，今個月二十二號喺台南市舉行完公祭後隨即火化，重會將骨灰灑喺台南外海，等爸爸可以遙望故鄉。
台灣女歌手蔡依林噚日喺台灣拍攝麥當勞廣告，對於緋聞男友周杰倫最近同女模特兒曾恬恬傳緋聞，蔡依林用國語講：「如果是真的，我當然很為好朋友高興。」好友孫燕姿成日鍾意幫蔡依林做媒，蔡依林話：「有一次她說要替我介紹一個心地善良又長得帥的人，結果對方是回教徒，要我戴面紗見面，我只好告訴她：『謝謝！再聯絡』！」
