喺嚟緊3月初舉行嘅瑞士日內瓦車展上，除有日前我哋為大家介紹過嘅多款新車，如Mini開篷版、平治SLK等等外，向來以研製概念車而聞名於世嘅Rinspeed，繼早前推出多款以前衞形象示人嘅概念車後，佢哋又會於今屆車展會場上，展出全新水陸兩用嘅RinspeedSplash概念車。
響一般道路上行駛時，一台能輸出140ps/7000rpm馬力，以及15.3kgm/3500rpm扭力嘅750cc天然氣Turbo引擎，能令擁有極輕車身嘅RinspeedSplash，由靜止起步加速至100km/h，需時僅約5.9秒，而極速更高達200km/h咁快，而尺碼為215/35R17（前輪）及225/35R18（後輪）嘅ContiSportContact2高性能輪胎，以及一套KW跑車化懸掛組合，更可令車子有唔錯嘅循迹表現㖭！另外，若要於水中行駛的話，只需輕按設於車內嘅控制鍵，設於車身兩旁及車尾嘅「水翼」便會放入水中，隨後便可於離水面60cm嘅環境下行駛，最高時速約為80km/h咁快㖭！至於車廂方面，鋪排亦見有一份吸引力，除空間寬敞外，承托力甚豐嘅座椅，亦能為乘客帶來舒適嘅乘車環境。