報稱因腿筋受傷，唔能夠幫澳洲友賽主隊委內瑞拉嘅列斯前鋒維杜卡，𠵱家可能搞出個大頭佛。
話說澳洲足總唔信維杜卡真係有傷，就向國際足協提出禁止維杜卡喺周六英超對曼聯，作為懲罰。足總又提到呢場波係世界盃外圍賽重要熱身賽，因為澳洲好有機會喺外圍賽附加賽對南美球隊。不過對曼聯一仗亦對尾二嘅列斯好重要，如果冇維杜卡壓陣，真係幾危。
與此同時，利物浦嘅另一名澳洲腳基維爾又話足踝受傷，醫生叫佢唔好搭長途機，否則對呢個傷患唔多好……咁都得？個個國腳都會整親㗎啦，就因為唔好坐飛機而唔去踢。「澳洲孖寶」事件其實只係冰山一角，代表國家出賽本來係光榮嘅事，搞成咁真係有啲悲。
今晚深夜絲帶台同收費台會直播三場友賽，球迷喺睇球星之餘，不妨睇埋佢哋身上面着住嘅波衫。大部份國家隊每兩年就會轉一轉波衫嘅款式，好似葡萄牙、美國同埋法國咁，佢哋都會着新波衫比賽；雖則喺設計上都係走復古路線，畀人新瓶舊酒感覺，但始終都有啲新鮮感嘅，不過球迷又要破財咯。
被祖記借咗去巴塞嘅荷蘭中場戴維斯話，如果佢自己可以揸主意，就會即刻同巴塞簽約，因佢覺得西班牙球迷對佢好好。之但係我求大俠要提醒佢，佢做唔做到巴塞人係兩間球會嘅事，而且聽聞巴塞來屆唔再用荷蘭兵，到時真係唔知乜嘢世界，戴維斯你都係唔好講咁多嘢好啲，留番條後路畀自己。
啱啱一月加盟英超球會樸茨茅夫嘅克羅地亞前鋒摩拿，最近借記者把口「勸告」英國女性對佢死心，因為佢只喜歡祖國嘅妹子喎！查實呢條光頭大嚿佬都唔算係靚仔，點解咁大口氣呢？睇番佢前妻及現任女友都係克羅地亞小姐級人馬，睇嚟佢喺情場的確有啲計，難怪可以講到自己情聖咁樣啦。