繼多家車廠先後發放，喺嚟緊瑞士日內瓦車展上，將會展出嘅最新車款後，就連日產汽車亦唔例外，佢哋亦於日前公布咗將於場內展出Qashqai概念車嘅部份資料，以吸引車迷注意咁話。
雖然暫時只有Qashqai概念車嘅預想圖片，但從中可以得知新車嘅車身線條來得圓渾有致之餘，獨特嘅車首設計，重帶點四驅車應有嘅剛強個性㖭！
至於車廂配搭方面，亦見來得極具吸引力，除空間寬敞闊落外，匹配承托力甚豐嘅座椅及齊全車廂設備配搭，乘坐既愜意又舒適，當然唔少得重有可按需要收摺放平嘅座椅配搭，以便運送較大型嘅物件，又或者係到戶外玩嘅用品（如爬山單車等）啦！然而，廠方喺現階段雖未有公布關於此車機械配搭嘅資料，但消息指廠方將會為其裝上一套電子四驅系統，以切合不同路面需要。
有興趣嘅車迷，就要密切留意更多關於日內瓦車展嘅更多消息喇！