行政署署長黃灝玄噚日喺鏞記請春茗，冇鵝食只好食燒羊髀。有行家八卦黃署長點過情人節，佢話同一班朋友喺屋企食餐好。唔講唔知，黃生下廚原來都有啲料到，佢重誇口話鮑參翅肚都識煮，花工夫啫，唔難，最緊要落足料，啲湯實好飲。
黃灝玄以前駐外經常請客，點都要識撚番幾味中國菜，唔係就唔夠「愛國」。至於佢整得好唔好食？好似「愛國治港」，有冇真本事，反而唔係太重要。不過，黃生可能好快有機會大顯身手，皆因有消息話佢又夠鐘調位，重可能又係駐外，八方就祝佢上京接前肥彭愛將梁寶榮個D8位，有職升啦。
就算調職，黃灝玄都要搞埋下星期個「聯合國亞太領袖論壇」，題目係「城市可持續發展」。個會由中國同聯合國合辦，香港做承辦單位，呢幾年香港通街都係「論壇」，有維園阿伯嘅城市論壇，又有陳啟宗嗰檔香發壇，一聽見論壇，香港人唔知會唔會瞌眼瞓？
傳真︰2623-9278
電郵︰